हे केरळ मधील मेल्लाटुर रेल्वे स्टेशन आहे. लॉकडाऊन मुळे ट्रेन्स चे ट्रॅकवरुन धावणे जवळपास बंदच आहे . गुलमोहराच्या वृक्षानी आपल्या लालचुटुक फुलांनी रेल्वे स्टेशन आणि रेल्वे रुळांवर आपली माया बरसली आहे. जणू काही एखादे सुंदर रंगीत निसर्गचित्र रेखाटले आहे.
त्या हिरव्या गर्द झाडांच्या पार्श्वभूमीवर शांत रेल्वे स्टेशन आणि प्लॅटफॉर्मवर , ट्रॅकवर पसरलेल्या गुलमोहराच्या पाकळ्या एकदम अनोखे दृष्य . खरोखर निसर्ग आपलं सौंदर्य मनसोक्त लुटतो फक्त दृष्टी हवी.
इतक्या सुंदर या पाकळ्यावरुन चालण्याची कल्पनाच किती रोमहर्षक आहे. नवनूतन दांपत्याच्या स्वागतासाठी अंथरलेला छान मऊशार गालिचा पसरलाय असं वाटावं.
मला अशी शांत , आपल्याच संथ गतिमधे रहाणारी , फारसा आवाजाचा गोंधळ नसणारी , सुबक स्वच्छ रेल्वे स्टेशन खूप आकर्षित करतात.
अकोला ते खांडवा मीटर गेज रेल्वेचा प्रवास बहूतांशी जंगलातूनच आहे. इथली रेल्वे स्टेशन्स म्हणजे एखादा बसायला बेंच किंवा कट्टा , दोन तीन वृक्ष आणि थोडी सपाटी केलेली हिरवळ असलेली जमीन बस्स !! जंगलातल्या वृक्षांचा एक छान सुवास दरवळत असतो.
साऊथला मदुराई - रामेश्वरम् च्या रुटवर उच्चीपुली स्टेशन असंच टुमदार , छोटंसंच स्टेशन आहे. प्लॅटफॉर्मवर छान जांभळाचे वृक्ष आहेत. अगदी स्वच्छ ठेवले आहे. एकदम शांत स्थळ . याच रुटवर पुढे सुप्रसिध्द पंबन ब्रिज आहे.
असेच सुंदर दृष्य कोकण रेल्वेच्या स्टेशन्सवर दिसतं. तिथे तर छाटे छोटे धबधबे , पिवळी सुरेख गवतफुले आणि हिरवे डोंगर असं अप्रतिम , डोळ्यांना सुखावणारं सर्व असतं. केवळ ते अनुभवण्यासाठी तरी पाऊस संपता संपता कोकण रेल्वेनी प्रवास करावा .
अनिरुद्ध कवीश्वर-
No comments:
Post a Comment